2 Tessalonisense 3:6-13 – Drie en Twintigste Sondag in Koninkrykstyd – 17 November 2019

Die fokus van vandag se teks is nie net om ’n goeie werketiek te hê nie nie, maar eerder oor wat dit beteken om saam in gemeenskap met mekaar te leef.  Ons word genooi om mekaar in ag te neem – ook in die kerk.  Ons sou  kon vra of ons ’n gemeenskap is waar ’n paar al die werk doen, of streef ons na ’n balans waar almal hul gawes en tyd gee om saam te werk? Farmer Duck deur Martin Wadell is ’n storie wat ons help om te sien wat met ’n gemeenskap gebeur waar die werklading nie gedeel word nie.  Die boer is baie lui en die arme eend moet al die werk doen.  In die proses word die eend fisies en emosioneel uitgeput!  Uiteindelik gryp die ander diere in, jaag die lui boer weg en begin almal help om die plaas te versorg.  Hierdie storie help ons om te sien hoe ons almal geroep is om te deel in die werk – by die kerk en by die huis.  Die preekriglyn begin met die verhaal van ‘n dertigjarige New Yorker, wie se ouers hom deur ‘n hofbevel gedwing het om hulle huis te verlaat. Millennials. Dit is die generasie, waarvan millenial sanger Micah Tyler sing dat hulle in ‘n koffiewinkel sit, sonder ‘n vaste betrekking, en vas glo hulle gaan miljoenêrs op 30 wees. Hulle gaan die wêreld verander – met hul kennis van essensiële olies. Kyk gerus na hierdie video in die erediens. Ons teks het alles hiermee te make, maar luiheid is natuurlik nie ‘n nuwe fenomeen, ‘n “millenial”-verskynsel nie! Dit sien ons soms in gesinne, só ook dikwels in die huisgesin van God. Dit was reeds so in Paulus se tyd!

Share

2 Tessalonisense 2:1-5,13-17 – Twee en Twintigste Sondag in Koninkrykstyd – 10 November 2019

Carolyn Brown sê dat kinders vandag moet hoor dat hulle nie bekommerd moet wees oor wat met hulle gaan gebeur wanneer hulle doodgaan nie.  Of oor wat met hulle gaan gebeur wanneer hulle groot is of tieners word nie.  Of… of….  Hulle moet eerder dink aan vandag.  Hulle moet vandag as God se kind leef.  Sy wys ook daarop dat dit nie vir kinders moeilik is nie, aangesien hulle geneig is om juis eerder in die hede te leef. Sluit daarom by maniere aan waarop kinders versoek word om nie in die hede te leef nie. Die preekriglyn sluit by die werklikheid aan dat die gemeente in Tessalonika Paulus verkeerd verstaan het.  Sy boodskap in sy eerste brief dat Jesus onverwags sou kom, is deur hulle geïnterpreteer dat Jesus moontlik reeds gekom het óf binnekort sou kom.  Paulus versoek hulle egter om nie so gou van stryk gebring te word deur misleidende interpretasies oor die wederkoms nie, maak nie saak of dit in ‘n profetiese uitspraak gedoen word of deur ‘n brief nie.  Die wettelose mens (Antichris?) waarvan Paulus praat wat eers moet verskyn, kan óf met ‘n demoniese mag óf ‘n despotiese leier verbind word. Oor die presiese betekenis is ons egter onseker. Hoe dit ook al sy, die Tessalonisense het die lering verstaan, want hy het dit blykbaar die vorige keer met hulle deurgepraat. Wat wel ook vir ons seker is, is dat dit die Satan is wat agter die wettelose en die wetteloosheid sit.  Let egter op dat hy dit net regkry om dié te mislei wat reeds nie die waarheid liefgehad en tot hulle redding aanvaar het nie.  Die veroordeling kom dus nadat hulle reeds hulle keuse teen God se boodskap in Jesus Christus gemaak en Hom verwerp het. Die preekriglyn brei dan uit oor die Satan se werk: versoeking (Matt 4), misleiding (1 Kon 22:21-22; Ef 6), teenspoed (Open 2:10) en aanklag (Job 1; Open 12:10).  Eno or die feit dat sy werk daarom ook nie uitgewis word deur “duiwel-uitdrywing” in die eerste plek nie, maar deur die waarheid te soek en uit te leef, sowel as om te bid en te getuig. Dit is hoe God ons standvastig maak en gebruik in hierdie wêreld.

Share

2 Tessalonisense 1:1-4,11-12 – Een en Twintigste Sondag in Koninkrykstyd – 3 November 2019

In die brief wat ons vandag lees, word daar gepraat van die mense in Tessalonika se goeie voorbeeld. Daar word vertel van hulle geloof, liefde en volharding, wat vir ander mense ’n voorbeeld is. Vertel die storie van Mean Jean, the Recess Queen deur Alexis O’Neill (skakel ingesluit). Mean Jean het oor die speelgrond regeer – niemand kon swaai voor sy geswaai het nie, niemand kon op die glyplank gly voor haar nie. Sy het almal geboelie. En dan, een dag, kom daar ’n nuwe dogtertjie – Katie Sue. Katie Sue stel ’n nuwe voorbeeld. Sy vra Mean Jean om saam met haar te speel! En so word die speelgrond weer ’n wonderlike plek vir almal om te speel. Katie Sue stel ’n goeie voorbeeld vir almal om te volg. Net soos wat die mense van Tessalonika se optrede oral vir mense ’n voorbeeld was, word Katie Sue se optrede die voorbeeld vir almal – en word die skool ’n beter, lekkerder plek! Die preekriglyn sluit aan by Tessalonika as ‘n metropolitaanse, multikulturele stad wat ook as die hoofstad van die provinsie Macedonië (noorde van Griekeland) gedien het. 2 Tessalonisense 1 getuig van God se krag en God se werk in die gemeente. Die gemeente het nie uit menslike vindingrykheid of menslike vaardigheid ontstaan nie. Dit was die krag van God. Wanneer ons vandg oor hierdie teks nadink, moet ons ook fokus op en getuig van God se krag en werk. Ons teks is nie ‘n morele lessie oor hierdie gemeente nie. Ons moenie die gemeente van Tessalonisense voorhou as voorbeeld van geloof en volharding wat ons gemeente behoort te na-aap nie. Nee, ons moet praat oor en onsself oopstel vir die kragtige werk van God se gende en vrede in ons. Daarom fokus ons vandag op vers 2: “Genade en vrede vir julle van God ons Vader en die Here Jesus Christus!”

• Klik hier om Word-aanbieding af te laai
Klik hier om PowerPoint-aanbieding af te laai

Share

Lukas 18:9-14 – Twintigste Sondag in Koninkrykstyd – 27 Oktober 2019 

Oorweeg gerus in Familietyd om die heerlike storie van die kluisenaar en die muis te vertel:  ‘n kluisenaar red ‘n muis wat amper deur ‘n voël geëet is.  Soos wat meer en meer diere die muis wil vang, verander die kluisenaar die muis in al groter diere.  Uiteindelik is die muis ‘n tier, wat vergeet dat hy eintlik ‘n muis is wat van die kluisenaar se gesekenke afhanklik is om hom veilig en beskerm te hou.  Sy trots veroorsaak dat hy vergeet wie hom help. Daar is ‘n skakel na ‘n video van die oulike storie. Daar is nog vier voorstelle wat jy kan gebruik, een wat spesifiek goed op Hervormingsondag gebruik kan word. Die preekriglyn sluit aan by Jesus se vorige lering aan die dissipels om volhardend te bid vir die koms van die koninkryk, die gelykenis van die onregverdige. In hierdie gelykenis van die Fariseër en die tollenaar stel Hy die vereistes vir toegang tot die koninkryk van God aan die orde. Daardeur illustreer Jesus op uitnemende manier God se vrye genade vir sondaarmense. Die ontvangs van God se genade bestaan daarin dat die sondaar besef hy/sy staan soos ʼn bedelaar (tollenaar) bakhand voor God. Die enigste moontlike handeling van die mens se kant is om jou skuld te erken en dit voor God te bely.

Share

Lukas 18:1-8 – Negentiende Sondag in Koninkrykstyd – 20 Oktober 2019

In Familietyd hou ’n Geel Bladsye op en vra die kinders waarvoor ’n mens dit gebruik.  Vra dan vir hulle of hulle weet wie om te bel as jou huis se ligte nie werk nie óf waar om plante te koop.  Herinner hulle dat die Geel Bladsye jou baie help, maar dat jy verseker moet weet waarvoor jy soek. Jy kan tog nie ’n dokter bel om jou huis se ligte reg te maak of ’n loodgieter as jy wil gaan uiteet nie. Die weduwee in Jesus se storie het presies geweet na wie toe sy moes gaan vir hulp: ’n regter – alhoewel hy nie baie gaaf was nie, was hy die regte persoon.  Daarom het sy met hom aanhou praat. Vra die kinders tot Wie ons moet bid as ons bang, alleen of hartseer is.  Natuurlik God!  Benadruk dat ons oor en oor en oor met God moet praat (dis gebed) omdat God ons kan help en Hy word nooit moeg om van ons te hoor nie. Met die prediking kan jy begin met die grappie van die man wat ‘n grassnyer nodig gehad het. Maar, terwyl hy loop om sy buurman se grassnyer te gaan leen, werk hy hom so op daaroor dat die buurman moontlik gaan nee sê, dat toe die deur oopgaan, hy sommer sê: “Man, hou jou grassnyer!” ‘n Mens kan jou só opwerk oor ‘n moontlike nee-antwoord dat jy nooit eers by vra uitkom nie. Jy besluit sommer self wat die antwoord gaan wees, en kom nie eers sover om te vra nie. Die gevaar is natuurlik dat só ‘n ervaring ons sommer negatief kan maak in ander situasies. Later skop jy die hond, by wyse van spreke, omdat jy moedeloos is dat jy nie jou sin in die werk of in jou huwelik gaan kry nie. Jesus het geweet dat ons die werklikheid só kan ervaar, en dat veral die negatiewe ervarings van die lewe ons negatief kan maak oor God, en dat ons kan dink dat Hy soos jou buurman is wat jy dink nie sy grassnyer vir jou sal leen nie. Die gevaar is dat sulke ervarings ons Godsbeeld kan affekteer. Dat ons later kan dink, maar God is soos ons buurman. En dan óf moedeloos raak om te bid, óf nog erger, ophou om te bid. Daarom vertel Hy vir ons ‘n gelykenis om ons te bemoedig. En Hy gebruik ‘n voorbeeld uit die regstelsel, ‘n regter wat goddeloos en liefdeloos was, wat nie volgens God se wette optree nie, en ook nie volgens die samelewing se wette nie.

Share

Lukas 17:11-19 – Agtiende Sondag in Koninkrykstyd – 13 Oktober 2019

Soos met enige narratiewe teks, kan jy gewoon die verhaal vertel. Gebruik die illustrasies van jou gunsteling Kinderbybel.  Of kry 10 diverse vrywilligers – minstens een kind.  Hulle kan deelneem aan die skriflesing deur dit op te voer terwyl jy lees.  As jy hulle regtig wil betrek, kan jy hulle met verbande toedraai – ‘n arm, ‘n hand, ‘n kop – en dan die verbande afhaal. Daar is ook ‘n video skakel en ‘n inkleurprent. Anne Lamott sê die drie belangrikste gebede vir ons geloofslewe, is “help, wow en dankie”.  Die dankbaarheid in vandag se teks gaan natuurlik nie bloot oor goeie maniere nie – soos Carolyn Brown in die video hierbo bevestig.  Dit gaan oor dankbaarheid in reaksie op God se geskenk van genade.  Ons teksgedeelte vertel die aangrypende gebeure hoe Jesus tien melaatse mense genees het. Hierdie gebeure vind plaas terwyl Jesus op reis was, al met die grens van Galilea en Samaria langs, om in Jerusalem te gaan ly en sterf. Dit lyk byna na ‘n toevallige ontmoeting. Vers 14  vertel egter dat Jesus hulle gesien en op grond daarvan aan hulle ‘n opdrag gegee om na die priesters toe te gaan om hulleself aan die priesters te gaan toon. Lukas lê klem op Jesus wat hulle “gesien” het. Hy meld nie iets daarvan dat Jesus hulle roep “gehoor” het nie. Wat Jesus sien, bring Hom in beweging. Volgens Lukas was die ontmoeting tussen Jesus en tien melaatse mans van korte duur, oënskynlik oppervlakkig en sonder diepsinnige kommunikasie of intieme kontak. Die tien mans reageer klaarblyklik direk en gehoorsaam Jesus se opdrag. Soos Jesus is ons ook op reis deur die lewe. Terwyl die lewe gebeur, vind ontmoetings plaas op plekke en punte wat ons nie vooraf beplan nie. Ons kan almal getuig van “tegemoetkomings” wat vir ons toevallig lyk, maar uiteindelik lewensveranderende ontmoetings is. Op hierdie reis moet ons ons oë oophou om te kan “sien” soos Jesus.

Share

Lukas 17:5-10 – Sewentiende Sondag in Koninkrykstyd – 6 Oktober 2019   

Mense dink altyd “hoe groter hoe beter”:  karre, huise…  Ons wil altyd nuwer, beter goed hê:  selfone, iPads, Nintendos.  En somtyds dink ons as iets nie meer of groter is nie, is dit regtig nie veel werd nie – dat wat ons het, nie genoeg is nie, ons het meer nodig om self enige iets werd te wees.  Dit is hoe die dissipels gevoel het oor hulle geloof!  Hulle het geweet dis moeilik om altyd gehoorsaam te wees.  Daarom het hulle vir Jesus gevra vir nóg geloof.  Dit sal sekerlik beter wees as dit groter is, as hulle meer het!  Maar Jesus antwoord hulle dat dit nie soveel saak maak hoe groot jou geloof is nie, maar eerder wat jy daarmee doen. Lees dan die fokusteks uit Die Nuwe Testament vir Kinders. Die preekriglyn werk met die hele gedeelte van vers een af en fokus op die dissipels wat meer geloof wil hê as hulle besef wat Jesus alles van hulle vra. Jesus se boodskap is dat dit moontlik is om God se gehoorsaam. Omdat God self die geloof (kennis, vertroue, toewyding, volharding) gee wat nodig is.

Share

Lukas 16:19-31 – Sestiende Sondag in Koninkrykstyd – 29 September 2019

Kry verskillende lesers om die skriflesing te doen. Daar is ook talle prente wat jy kan wys tydens die Skriflesing. Onthou, ons is in die Seisoen van Barmhartigheid. Die vraag is, wie is die mense wat ons nie raaksien nie, wat ons ignoreer?  Laat die kinders saam met jou dink wie hierdie mense is.  Dit sal goed wees as jy die kinders kan bemagtig om iets te doen.  Dalk het julle ‘n deurlopende projek vir die die Seisoen van Barmhartigheid – kinders kan nie-bederfbare kos bring, of skryfbehoeftes.  Iets wat ‘n plaaslike bediening benodig, wat die kinders sal weet ‘n werklike verskil in hul omgewing sal maak.  Dink saam met hulle aan maniere waarop hulle kan uitreik na “onsigbare” mense – en wees gereed om dit deur te voer. Die preekriglyn maak erediensgangers eers sensitief vir belangrike vrae, voordat die teksgedeelte gelees word. Die gelykenisse in hoofstuk 16, waaronder ons teks, het dit onder andere oor die werking van mag in gemeentes en in samelewings. Die gelykenisverhale dink na oor hoe mense in die algemeen met mag maak en behoort te maak. Die vraag is hoe die rol van die wet in God se koninkryk ons optrede bepaal. Die gelykenisse vra ook hoe God en Jesus Christus menslike mag beoordeel en oor mense se optrede oordeel.

Share

Lukas 16:1-13 – Vyftiende Sondag in Koninkrykstyd – 22 September 2019

’n Moeilike gedeelte vir kinders. Gebruik die teks uit Die Nuwe Testament vir Kinders en lees dit dramaties voor. Die preekriglyn plaas die verhaal binne die konteks van Jesus se laaste reis na Jerusalem. Sy werk op aarde sal daar afgehandel word. Hy is besig om die laaste dinge vir sy dissipels te leer. Hulle moet aangaan met die werk, al sal dit lyk asof alles rondom hulle tot ‘n einde gekom het.  In die proses vertel Hy waarskynlik een van sy mees uitdagende gelykenisse. Dit handel duidelik oor die gebruik van geld en besittings, asook die verantwoordelikheid wat daarmee saamgaan. Maar, hierdie kort, fiktiewe vertelling is bedoel om ‘n geestelike waarheid uit te lig, met ‘n heel onverwagte draai. Ons moet dáárom nie simboliese betekenis aan elke persoon of gebeurtenis prober koppel nie. Dis ook nie ‘n voorbeeldvertelling wat wil sê nie: “Gaan en doen net so.” Indien dit die geval was, sou ons sê Christene moet doen wat die oneerlike bestuurder gedoen het! Dit kan tog nie. Hier word veeleer oor bekering gepraat in terme van die gebruik van geld, besittings en lewensmiddele in die lewe van gelowiges. Jesus sê dat die mense van die wêreld weet hoe die wêreld werk en hulle gebruik dit tot hulle voordeel. Hoekom verstaan kinders van die lig dan nie hoe die koninkryk van God werk nie? Hy roep dissipels op om wys te word in die weë van die koninkryk; soos ander mense wys is in die weë van die wêreld.

Share

Lukas 15:1-10 – Veertiende Sondag in Koninkrykstyd – 15 September 2019

Carolyn Brown herinner ons dat ons kinders se perspektief op “verlore wees” in ag moet neem. Kyk gerus ook na haar baie sinvolle voorstelle vir maniere om hierdie teks met kinders te bespreek. Jy kan ook ‘n teddiebeer of ‘n legkaart gebruik. Voorstelle daarvoor en nog ander ingesluit. Die preekriglyn begin met ‘n fokus op Lukas se evangelie as ‘n besondere geskrif. Ons kan sê hy is die eerste ware geskiedkundige wat oor Jesus geskryf het. Sy boek plaas Jesus in die hart van die destydse Joodse wêreld, maar ook in die hart van die Romeinse wêreld waarbinne die evangelie ingebreek en dit radikaal verander het. Ons teks speel af teen die agtergrond van tollenaars en sondaars, Fariseërs en Skrifgeleerdes en hul houdings en interaksies. Soos hulle is ons algemene siening van bekering dikwels redelik selfgerig, in plaas daarvan dat ons die wonder van God se liefde en soeke raaksien. Dit is wat die gelykenisse ons help raaksien. Ons kyk so maklik na verlossing asof dit net om myself gaan; om dit wat ek nodig het en om voordele wat ek gaan kry. Dit is ek wat vergiffenis van sonde kry; ek wat vrede in my gemoed kry; ek wat beskerming kry; ek . . . ek . . . ek! Dit is alles werklik baie wonderlik, maar die grootste, wonderlikste werklikheid is dat ons kinders van die lewende God is; om tuis te kom waar ons moet wees, veilig by ons Hemelse Vader. Een van God se kinders. Vreugde, verlossing en bekering is die terugvind van ‘n verlore skaap/munt deur sy Vader. Dit is die ware rede vir feesvier en vreugde in die hemel!

Klik hier om Word-aanbieding af te laai
Klik hier om PowerPoint-aanbieding af te laai

Share
1 2 3 27