Kersfees – 25 Desember 2018 – Titus 2:11-14

Betrek kinders van verskillende ouderdomme deurgaans deur die liturgie. Laat hulle kerse aansteek en voorlesings doen. Dikwels bring kinders hul Kersgeskenke saam erediens toe. Vra dat hulle dit vir die gemeente kom wys en geniet dit saam met hulle. Herinner mekaar dan aan die heel beste geskenk, net voordat julle ‘n lofsang sing. Daar is ’n magdom pragtige Kersverhale wat jy kan lees! Ons gee talle skakels na bv: Panov; Eseltjie se droom; Old Bafana; Star Bright; The Giveaway en Song of the Stars. Carolyn Brown wys op ‘n interessante vergelyking wat vanuit die Titus Skriflesing getrek kan word tussen Jesus en Kersvader.

Kersvader bring nét geskenke vir die kinders wat soet was: “Santa brings toys only to the good. Jesus comes to love us not because of anything we have done to earn it but because God loves us.” Die preekriglyn begin by die verhaal van Sully, die noemnaam van Chesley Sullenberger III, wat die kaptein van die passasiersvliegtuig was wat ‘n noodlanding op die Hudsonrivier moes doen. In die fliek vertel die medevlieënier hoe briljant Sully die situasie hanteer het. Vlieëniers tree volgens vooraf ingeoefende prosedures op. Sully moes sekere van hierdie instruksies ignoreer, omdat dit in die situasie nie van toepassing was nie. Hy moes die regte prosedures identifiseer en dit nougeset uitvoer. Dit het hy briljant gedoen. Die omgekeerde is ook waar. Die verkeerde gedrag kan lewens kos en verwoes. Dit is waarskynlik maklik om aan voorbeelde te dink waar growwe nalatigheid groot skade aan mense aangerig het.

Dit is egter ook waar van “minder ernstige” oortredings. Dit is dikwels liefdeloosheid, hooghartigheid, veroordeling en beterweterigheid by gelowiges wat mense van die geloof “afsit”. Dit is daarom seker nie om dowe neute dat Paulus in hierdie brief aan Titus aandag gee aan Titus se gedrag nie. Titus is ‘n jong geestelike leier van ‘n jong gemeente op die eiland Kreta. Paulus gee egter nie net aandag aan Titus se gedrag nie. Hy is begaan oor die gedrag van die gelowiges in die algemeen, van almal in die gemeente. Dit sluit in Titus, die ouderlinge, gesinslede teenoor mekaar en gelowiges teenoor ongelowiges.

Share