Markus 6:1-13 – Sewende Sondag in Koninkrykstyd – 8 Julie 2018

Begelei die kinders aan die hand van ‘n verduideliking van wie George Washington was en hoe mense op hom gereageer het (inligting by die skakel), om hulle te help verstaan hoekom die mense van Jesus se dorpie nie na hom wou luister nie. Kleiner kinders sal waarskynlik nie verstaan wat jy bedoel as jy sê dat ons ook nie altyd vir Jesus erken nie. Praat eerder oor die manier waarop God almal wil gebruik, maar ons idees oor hulle soms maak dat ons nie sien hoe God hulle gebruik nie. Die preekriglyn sluit hierby aan met die verhaal van Arlyn Lawrence wat vertel hoe haar 13-jarige dogter, Heather, begin kla het oor pyn in haar regtersy. Dit was haar blindederm, ‘n noodoperasie was nodig. By die hospitaal aangekom, het Arlyn haar moed bymekaargeskraap en vir haar dogter gebid. Sy het gevra die Here Jesus moet Heather aanraak en vir haar genesing gee. Spoedbloedtoetse is gedoen, wat ‘n verhoogde witbloedtelling aangedui het. Heather is vir ‘n sonar gestuur, en die chirurg het begin gereedmaak vir die operasie.

Dit was op pad na die sonar dat Arlyn die eerste verandering by Heather opgemerk het. Toe vind die sonar plaas. Die radiografis kon nie die ontsteekte blindederm sien nie. Die radioloog kom handjie bysit. Hulle druk op die pynlike area van haar liggaam, maar Heather beleef nou nie meer pyn nie. Chirurgie was nie meer aangewese nie. By die huis aangekom, lui die foon. Dit is die bekommerde dominee wat gehoor het van Heather se terugslag. Hy wil hoor hoe het die operasie afgeloop. Heather het die oproep beantwoord. Arlyn hoor hoe sy sê: “Alles is reg, dominee. Geen operasie nie. Ek het wel verskriklike pyn gehad. Toe bid my ma vir my. Die Here het my toe genees.” Met dié verhaal word Jesus se sending van sy dissipels vierkant op die tafel geplaas. En dit roep ons op om op dieselfde wyse as hulle, en as Arlyn, die Here te vertrou vir genesing. Ons as Westerlinge kan so wetenskaplik raak dat ons die vanselfsprekende wonder van God se daaglikse aanraking en genesing nooit raaksien, of daarom vra nie. Ons leef in ‘n geslote wêreld, waar daar min ruimte is vir die feit dat God soms die effek van siekte en lyding wegneem. Soms ook nie, soos in Paulus se geval waar God se genade vir hom genoeg was. Hoe minder ons bid om genesing en herstel, hoe minder daarvan beleef ons.

Share

Markus 5:21-43 – Sesde Sondag in Koninkrykstyd – 1 Julie 2018

Dit is heeltemal voldoende om gewoon die Bybelverhale vir kinders te vertel, sonder om ‘n morele lessie daaruit te probeer haal. Daar is skakels na mooi prente uit ‘n Kinderbybel en na ‘n video uit die Jesus Storybook Bible met ’n hele les-plan met hulpmiddels. Daar is ook skakels na’n direkte voorlesing uit die CEV Bybel, nét van die dogtertjie se verhaal. Les bes, daar is ook ‘n inkleur-uitknip aktiwiteit om te maak terwyl die kinders luister na die preek. Die preekriglyn sluit aan by die onlangse studiestuk waaraan kerke reg oor die wêreld saamgewerk het. Hulle het gevra waarmee God op aarde besig is? Waar kan mens God verwag? Die gevolgtrekking was dat God lewe gee, ware lewe, lewe in oorvloed. Lewe vry van sondebande, herstelde lewe in verhouding tot God, tot mekaar en tot die wêreld. In ons teks van vandag sien ons hoe Jesus lewe bring vir mense wat sukkel en kwyn. Ons sien hoe Jesus mense aanraak en vir hulle lewe in oorvloed bring. Waar God beweeg, floreer lewe in sy volste en rykste betekenis.

Share

Psalm 9:9-20 – Vyfde Sondag in Koninkrykstyd – 24 Junie 2018

Daar is ’n diagram waarin sleutelwoorde uit die fokusteks weggesteek is vir Familietyd. Die preekriglyn lei in met ‘n fokus op die verskillende emosies wat in die Psalm voorkom. Daar is dank, lof, blydskap en vreugde. Daar is ook leed, klag en selfs woede. Dit is duidelik dat die digter ‘n intieme en persoonlike verhouding met God het wat hom vreugde gee. Maar daar is mense (vyande, magte) wat sy vrede en vreugde steel. Daarom is daar voortdurend beweging en polariteit in die psalm. Die een oomblik loof hy die Here vir sy goedheid, die volgende oomblik vloek hy sy vyande. Aan die een kant is daar lof en dankbaarheid teenoor die Here vir sy goedheid en guns. Aan die ander kant kla hy oor die leed en ellende wat mense hom aandoen. Hierdie besondere dinamiek in Psalm 9 open diep perspektiewe op geloof. Hier is nie ‘n eenvoudige, romantiese teologie van sekerheid en “alles-sal-ok” wees nie. Dit is eerder ‘n teks wat die donker kant van die lewe met God en ander, asook die veelkantigheid van geloof, verwoord.

Share

1 Samuel 15:34 – 16:1 – Vierde Sondag in Koninkrykstyd – 17 Junie 2018

Onthou, dit is belangrik dat kinders die Bybelverhale hoor. Jy kan die teks dramaties lees, uit ’n kindervriendelike Bybel lees, kinders kry om dit op te voer terwyl jy dit lees of ’n video van die Skriflesing wys, soos die ingeslote een uit die Jesus Storybook Bible. Daar is ook ’n volledige byeenkoms op grond van die Jesus Storybook Bible se vertelling van Dawid se salwing. Ons teks begin op ‘n mismoedige noot. Koning Saul en profeet Samuel se weë skei. Dit gebeur omdat Saul se koningskap misluk. Saul is ongehoorsaam aan die Here se opdragte. Daarom is die Here spyt dat Hy Saul koning gemaak het, en Samuel profeteer dat die Here die koningskap van Saul wegneem. Hierdie skokkende gebeure laat Israel in ‘n moeilike posisie. Saul is steeds koning, deur Samuel gesalf. Nou het Samuel aangekondig dat God teleurgesteld is en Saul as koning verwerp.

Op die koop toe wil die Here ‘n nuwe koning in Saul plek aanwys uit die geledere van Isai se seuns. Vanselfsprekend is Samuel skepties en vreesbevange. As Saul daarvan hoor, gaan die vonke spat. Die Here wil niks hoor nie. Samuel moet gaan met die versoek dat hy vir die Here ‘n offer wil bring. God sal dan wys wat hy moet doen en wie hy tot koning moet salf. Samuel moet aangepor word om te doen wat die Here wil hê. Ons teks praat dus sterk oor leierskap, en oor die feit dat leiers aan God verantwoording verskuldig is. Trouens deur Hom aangestel word. Aangesien God konings in skaapwagters sien, moet ons stadig oor die klippe met ons oordele oor ander. Ons kan nie baie ver sien nie, en ‘n mens kan nie ‘n boek bloot op sy omslag beoordeel nie.

Share

1 Samuel 8:4-11, (12-15), 16-20, (11:14-15) – Derde Sondag in Koninkrykstyd – 10 Junie 2018

Jy kan die gedeelte met drie voorlesers in Familietyd voorlees (Samuel, verteller en die Here). Met ouer kinders kan jy ’n gesprek voer oor leierskap aan die hand van die profeet vs koning debat. Die preekriglyn werk met die hele hoofstuk sowel as ‘n gedeelte uit hoofstuk 11 waar vertel word hoe Saul toe as die eerste koning van Israel aangestel is. Die seun Samuel waarvan ons verlede week kennis geneem het, het met verloop van tyd ook self oud geword en ‘n opvolgplan in werking gestel. Sy plan en dié van die volk het egter gebots. Hy het tot God gebid, maar die nuus gekry dat God besluit het dat aan die volk se versoek toegee moes word.

God het die versoek as verwerping van God self beskou. Die uiteinde van hierdie proses was dat Saul as eerste koning van Israel in Gilgal bevestig is. Dit is ‘n belangrike Skrifgedeelte om oor God as koning, oor die regering van God na te dink, en ook oor die manier hoe ons as God se volk lewe en die tipe leierskap waarmee ons werk. Nog dieper gaan dit oor God se besluit om se bereidheid om die pad met sy volk te stap selfs al staan hulle Hom teë. Uiteindelik oorweldig God se karakter selfs mense wat oënskynlik kies om eerder ander leiers te vertrou.

Share

1 Samuel 3:1-10, (11-20) – Tweede Sondag in Koninkrykstyd – 3 Junie 2018

Dit is belangrik dat kinders die Bybel leer ken. Met narratiewe tekste soos hierdie, is dit goed om eerder net die teks op dramatiese manier te lees as om ‘n boodskappie te hê. Jy kan dit uit ‘n mooi kinderbybel lees. Of kry ‘n jong kind en oumens om die gedeelte op te voer terwyl iemand (dalk ‘n kind?) dit lees. Daar is ook ‘n skakel na ‘n oulike video van die teksgedeelte. “Die Woord van die Here is in daardie tyd min gehoor.”

Só begin ons teksgedeelte die verhaal vertel van hoe God ‘n betroubare profeet en priester in Israel gevind en aangestel het. Dit was onstabiele tye. Die volk Israel het die beloofde land betree, maar daar was nie ‘n vaste, sentrale gesag in die land nie. Dit was die tyd van die rigters. Die volk het die Here gedien, maar dan telkens afgedwaal en in ellende beland. Dan moes die Here ‘n rigter aanwys om hulle weer op koers te kry. Vir ‘n tyd het dinge dan weer glad verloop, tot die verval weer begin het. Met Samuel sou dit verander. Hy is profeet en priester van die Here in die oorgang van die Rigtertyd na die aanwys van Israel se eerste koning.

Share

Romeine 8:12-17 – Eerste Sondag in Koninkrykstyd; Drie-eenheidsondag – 27 Mei 2018

Daar is vyf uitstekende opsies vir Kindertyd: kerse en musiek met die oog op die Drie-Eenheid, erfstukke met die oog op ons hemelse erfenis, radio met die oog op ingestem wees op God, en ‘n ekstra PowerPoint oor aanneming. Die preekriglyn begin met ‘n meesleurende verhaal van aanneming deur pastoor Ronnie Stewart en sy vrou Krystal die stigters van Refugee Church. “Ons kan maar net lag oor God se sin vir humor,” vertel Krystal. “Net die dag voor ons die seuntjies die eerste keer huis toe geneem het, het ek en Ronnie ‘n diep gesprek gehad oor my volledige histerektomie na ‘n vroeë kankerdiagnose. Ons was hartseer en moes vrede maak dat ons nie meer kinders sou kon hê nie.” Toe gee God vir ons kinders. En vir die pragtige twee kinders liefdevolle ouers wat hulle aanneem en versorg. God doen aannemings. Trouens, volgens ons teks, is die aanneming tot kinders deur die werk van die Heilige Gees die hart van die evangelie van Jesus Christus.

Share

Johannes 15:26-27; 16:4b-15 – Pinksterfees – 20 Mei 2018

Hierdie is ’n spesiale feesdiens. Kinders kan lekker deelneem as jy vooraf vlam-kleurige “streamers” maak van sagte lap wat aan ’n stokkie vasgemaak word. Laat die kinders (en ’n paar volwassenes) dit tydens die lofsang swaai. The Day When God Made Church deur Rebekah McLeod Huttois is ook ’n pragtige storieboek wat Pinkster verduidelik. Jy kan die hele boek lees by die skakel wat ons verskaf. Daar is ook ‘n mooi inkleurprent en ‘n voorbeeld van ‘n kort toneelstuk. Die preekriglyn sluit by die gedagte van Pinksterdag as die geboortedag van die kerk aan. Op ‘n dag soos vandag dink mens aan ‘n verskeidenheid tekste uit die Ou Testament wat hierdie wonder verwoord. Daar is die oesfees in die Pentateug. Daar is Esegiël se visioen van die beendere wat weer lewe kry.

Daar is ook die Nuwe Testament se verdere besinning hieroor. Paulus raak liries in Romeine 8 oor die Gees wat ons bystaan. Dit gee vir ons ‘n konteks waarbinne ons die wonderlike boodskap van Johannes 15 kan hoor dat ons Trooster ons in die waarheid lei. Stephan Joubert skryf as volg: Saam met die Vader vorm die Seun en die Parakleet die hemelse eenheid wie se missie dit is om mense hier op aarde te verlos en deel te laat hê aan hierdie ewige Goddelike familieverwantskap. Die Johannes-evangelie noem drie aspekte van hierdie bemiddelende teenwoordigheid. Van die kerk word nou waar wat in die eerste plek van Jesus waar was. Jesus het uit die krag van die Heilige Gees geleef. Vanaf Pinksterfees word hierdie werklikheid ook vir die kerk – vir ons – beskikbaar.

Share

Handelinge 1:15-17, 21-26 – Sewende Sondag van Paastyd – 13 Mei 2018

Lees die fokusteks uit Die Nuwe Testament vir Kinders. Aangeheg is ’n ook woordsoek-speletjie. Ons teks speel af op die vooraand van die uitstorting van die Heilige Gees. Die dissipels wag in Jerusalem op die belofte van die Vader, die Heilige Gees. Deur die Heilige Gees sal hulle krag ontvang en sal hulle Jesus se getuies in Jerusalem en verder wees. Ons teks handel ook oor die verkiesing van Mattias om die plek van die verraaier Judas in die dissipelkring in te neem. Sommige van die temas en beredenering in die teks is vreemd vir moderne lesers. Deel daarvan is die beskrywing van Judas se grusame dood. Baie predikers wil eintlik hierdie vermelding liewers weglaat en dit nie in die erediens voorlees nie.

Mens voel amper dit het ‘n ouderdomsbeperking nodig. Moderne lesers kan wonder of van die beginsels en logika van die teks vandag nog op ons van toepassing is. Lukas doen hier moeite om vir ons te wys dat dié teks steeds van toepassing was en vandag nog is. Die Skrif vir hierdie eerste gelowiges was die Ou Testament. Dit moes verstaan word as betroubare getuie van God se werk in Jesus, en deur sy dissipels. Die verwysings vervul dus die rol om die ou verbond en die nuwe verbond aan mekaar te skakel. Daarin speel die Heilige Gees ‘n sentrale rol soos Hy die dissipels aan die hand van die Skrif hierdie spesifieke keuses laat maak. Daarom kan ons dieselfde doen met die Skrif vandag, ook soos dit aangevul is deur die Nuwe Testament.

 

Share

Handelinge 1:1-11 – Hemelvaart – 10 Mei 2018

Lees die verhaal uit ‘n kinder-vriendelike Bybel, dalk met behulp van dié video waarvan ‘n skakel ingesluit is. Klik hier vir dié video. Daar is nog ander kreatiewe hulpmiddels ingesluit waarmee jy die verhaal kan vertel. Die preekriglyn sluit by Lukas se evangelie aan en wys hoe alles wat Jesus gedoen en geleer het nou verder voortgesit sal word in die wyse waarop die Heilige Gees die apostels gaan lei en aan die kerk as geloofsgemeenskap gaan vorm gee. Vandag, wanneer ons Hemelvaartfees vier, word ons ook uitgedaag om na te dink oor ons reaksie op hierdie gebeure.

Die versoeking is altyd daar om te reageer soos die dissipels aanvanklik reageer het: passief, deur op een plek te bly staan en nie te doen waarvoor hulle geroep is nie. Dalk is die grootste gevaar nie eers dat ons passief is nie, maar met die verkeerde goed besig is. Is ons dalk besig om die een of ander koninkryk op te rig wat nie in pas is met wat God vir ons wil nie, soos die dissipels gehoop het dat God Israel se koninkryk in daardie tyd sal herstel, maar Jesus hulle daarop gewys het dat dit nie vir hulle is om iets daarvan te weet nie? Ons is nie geroep om stil te staan, te spekuleer of om ander koninkryke te bou nie, maar juis om terug te keer na ons konteks (ons “Jerusalem”?), om daar en verder weg te getuig. Die troos is dat ons dit nie alleen doen nie. Dit is immers die verhaal van Handelinge dat Jesus nou deur sy Gees, in die kerk, steeds “doen en leer”.

Share
1 2 3 4 21